لیژنەی دارایی و تیمێكی كونسوڵخانەی بەریتانیا كۆبوونەوە
پێشنیوەڕۆی ئەمڕۆ پێنجشەمە 2019/10/31، لیژنه‌ی دارایی و كاروبارى ئابوورى له په‌رله‌مانى كوردستان به سه‌رپه‌رشتیی زیاد جەبار سەرۆكی لیژنە و ئاماده‌بوونی بڕیاردەرو ژمارەیەك لە ئەندامان و راوێژكارانی لیژنەكە، پێشوازیی لە ڤینێتی ئانیكات بەرپرسی تیمی سیاسیی كونسوڵخانەی گشتیی بەریتانیا لەهەولێر كرد.
لە كۆبوونەوەیه‌كدا گفتوگۆ لەسەر چۆنیەتیی چارەسەركردنی كێشه هه‌ڵپه‌سێردراوه‌كانى نێوان هه‌رێمى كوردستان و حكومه‌تی فیدرالیی عێراق كرا و لیژنەكە بەگرنگی زانی كە بەریتانیا رۆڵی هەبێت لە نەهێشتنی ئەو مەترسیانەی لەسەر بودجەی هەرێم و شایسته داراییه‌كانى هەیە.
هەر لە كۆبوونەوەكەدا داوا لە حكومەتی بەریتانیا كرا كە هاوكاریی حكومەتی هەرێم بكات بەمەبەستی چارەسەركردنی كێشەكانی لەگەڵ حكومەتی عیراق بەتایبەت لە پاراستنی مووچەی فەرمانبەرانی هەرێم كە لە بەغداوە دێت .
لەبەشێكی دیكه‌ی كۆبوونەوەكەدا جەخت لەپشتیوانییەكانی بەریتانیا بۆ كوردستان كرایەوەو داواشیانكرد ئەو وڵاتە رۆڵی هەبێت لەزیاتر لەیەكنزیكردنەوەی هەولێرو بەغدا.