پەیامی ماتەمینيی سەرۆکایەتیی پەرلەمان بەبۆنەی یادی پەنجا ساڵەی قوربانیانی گوندی صوریا لە بادینان
پەیامی ماتەمینی سەرۆکایەتیی پەرلەمانی کوردستان بەبۆنەی یادی پەنجا ساڵەی قوربانیانی گوندی صوریا لە بادینان
ئەمەی خوارەوە دەقەکەیەتی:
لە رۆژێکی وەکو ئەمرۆ لە ساڵی ١٩٦٩ و پێش نیو سەدە ، لە کوشتارگەیەکی خوێناویدا بەدەستی رژێمی بەعس لە گوندی صوریا لە بادینان خوێنی پاکی دەیان هاووڵاتی ژن و پیاو و گەنج و پیر لە مەسیحی و موسڵمان، لە کلدان سریان ئاشوور و کورد بەبێ تاوان ڕژا و شەهید کران، یەکەم شەهیدی ئەم کارەساتەش قەشە (حنا قەشا) قەشەی کڵێسای کلدانی کاسۆلیکی بوو ، و تەنها لەبەر بەرگری کردنی لە خەڵکی گوندی صوریا ، لەبەرچاوی خەڵکی گوندەکە بەدەستی (عبدالكریم الجحیشی) ئەفسەری سوپای عێراقی لە سێدارە درا.
لە پەرلەمانی کوردستان بەو پەڕی ڕێزەوە دەڕوانینە قوربانیانی ئەم کارەساتە دڵتەزێنە و بەڵێن دەدەین کە هەمیشە داکۆکیکارێکی سەرسەخت دەبین بۆ برەودان بە پێکەوە ژیانی ئایینی و نەتەوەیی لە هەرێمی کوردستان، و بەدیهێنانی دادپەروەری لە ماف و ئیمتیازاتی کەس و کاری گشت شەهیدان، و سەری رێزو نەوازش دادەنوێنین بۆ شەهیدانی کوشتارگە خوێناوییەکەی صوریا و گشت شەهیدانی کوردستان.
سەرۆکایەتیی پەرلەمانی کوردستان
١٦/٩/٢٠١٩