سەرۆکی پەرلەمانی کوردستان لەگەڵ بۆردی ڕاوێژکارانی یاسایی سەرۆکایەتی پەرلەمان کۆدەبێتەوە

ئه‌مڕۆ یه‌كشه‌ممه‌ 19/4/2020 به‌ مه‌به‌ستی تاوتوێكردنی ئه‌و لێكه‌وته‌ یاساییانه‌ی كه‌ له‌ ماوه‌ی ڕابردوودا به‌ هۆی ڤایرۆسی كۆرۆناوه‌ دروستبوون، د. ڕێواز فایەق سه‌رۆكی په‌رله‌مانی كوردستان كۆبوونه‌وه‌یه‌كی له‌گه‌ڵ ڕاوێژكارانی یاسایی په‌رله‌مان و بۆردی ڕاوێژكاری سه‌رۆكایه‌تی په‌رله‌مان ئه‌نجامدا.

له‌ كۆبونه‌وه‌كه‌دا سه‌رۆكی په‌رله‌مانی كوردستان له‌گه‌ڵ هه‌ریه‌ك له‌ ڕاوێژكارانی یاسایی و بۆردی ڕاوێژكاری یاسایی سه‌رۆكایه‌تی په‌رله‌مانی كوردستان شرۆڤه‌ی بڕیارێكی ئه‌نجومه‌نی دادوه‌ریان کرد، كه‌ له‌ ڕۆژی 8/4/2020 تایبه‌ت به‌ ڕاگرتنی ماوه‌ی تانه‌ لێدان له‌ داوا سزایی و شارستانیه‌كان ده‌ریانكردووه‌، له‌ كۆبونه‌وه‌كه‌دا بڕیاردرا به‌ ئاڕاسته‌كردنی یاداشتێك بۆ ئه‌نجومه‌نی دادوه‌ری سه‌باره‌ت به‌ تێبینیه‌ بابه‌تی و ڕواڵه‌تیه‌كانی بڕیاره‌كه‌.