Skip to the content
Menu

پەیامی پیرۆزبایی جێگری سەرۆکی پەرلەمانی کوردستان بەبۆنەی جەژنی رەمەزانی پیرۆز

لەپەیامێکدا هێمن هەورامی جێگری سەرۆکی پەرلەمانی کوردستان بەبۆنەی هاتنەوەی جەژنی رەمەزان پەیامێکی پیرۆزبایی ئاراستەی موسڵمانانی کوردستان و عێراق و جیهان دەکات، ئەمەی خوارەوە دەقی پەیامەکەیە:

بەناوی خوای مەزن و دلۆڤان

بەبۆنەی هاتنەوەی جەژنی ڕەمەزان، جوانترین پیرۆزبایی لە موسڵمانانی کوردستان بە تایبەتی و عێراق و جیهان بە گشتی دەکەین.

هاووڵاتیانی خۆشەویست..

ئەم جەژنە لە کاتێکدایە کە هەرێمی کوردستان و عێراق و جیهان ڕووبەڕووی پەتایەکی کوشندە بووەتەوە و بە هۆیەوە تووشی کۆمەڵێک لێکەوتەی خراپ و سەختی تەندروستی، ئابووری و سیاسی بووینەتەوە، بەڵام پێویستە لەسەرمان لەم کاتانەدا بە گیانی برایەتی و لێک تێگەیشتن و دڵسۆزی ڕووبەڕووی قەیرانەکان ببینەوە.

هەرێمی کوردستان پێشتریش بەسەر زۆر قەیراندا زاڵ بووە و بەهۆی دڵسۆزی و لە خۆبردوویی هاووڵاتیان دۆخی لەمە سەختتری بڕیوە، کە ئەمە وامان لێدەکات بە باوەڕێکی زۆرەوە بڵێین دواڕۆژێکی گەش و ئایندەیەکی ڕووناک چاوەڕێمان دەکات.

جەژن واتا هەرە دیارەکەی لێبوردەیی و لێخۆشبوون و گەردن ئازادییە، پێویستە بەو گیانە دەست بخەینە ناو دەستی یەک و بەسەر سەختییەکان باز بدەین.

جارێکیتر بەبۆنەی هاتنەوەی جەژنی ڕەمەزان، پیرۆزبایتان لێ دەکەین، و داواکارین لە خوای گەورە کوردستانمان بپارێزی و بەهێزتر و ئاوەدانتری بکات۰

هێمن هەورامی

جێگری سەرۆکی پەرلەمانی کوردستان

٢٣/٥/٢٠٢٠