دوو ڕاوێژکاری حکومەت بۆ پرسی مادده‌ی ١٤٠ سه‌ردانی لیژنه‌ی ناوچه كوردستانییه‌كانی ده‌ره‌وه‌ی ئیداره‌ی هه‌رێم ده‌كه‌ن
به‌مه‌به‌ستى دروستكردنی هه‌ماهەنگی له نێوانیاندا بۆ پرسی ناوچە کوردستانییەکانى ده‌ره‌وه‌ی ئیداره‌ی هه‌رێم و چۆنیه‌تیی چارەسەرکردنی کێشەکان، ئه‌مڕۆ دووشه‌ممه ٢٠٢١/٨/٢٣، لیژنەی ناوچە کوردستانییەکانی دەرەوەی ئیدارەی هەرێم، به سه‌رپه‌رشتیی جوان یونس ڕۆژبه‌یانی، سه‌رۆكی لیژنه و ئاماده‌بوونی بڕیارده‌ر و ژماره‌یه‌ك له ئه‌ندامانى و ڕاوێژكارانى لیژنه‌كه، له هۆڵی لیژنه له ته‌لارى په‌رله‌مان، له‌گه‌ڵ هه‌ریه‌ك له ڕاوێژكارانی حكومه‌تی هه‌رێم دژوار فایق، سەرۆکی بۆردی دۆسییەی ماددەی ۱٤٠ و ڕێبوار تاڵه‌بانی ، جێگرى سه‌رۆكی بۆرده‌كه ڕاوێژکارانی حکومەتی هەرێمی کورستان، كه تازه له پۆسته‌كانیان ده‌ستبه‌كاربوون، كۆبووه‌وه.
له كۆبوونه‌وه‌كه‌دا جه‌خت له دروستكردنی هه‌ماهه‌نگی له نێوان هه‌ردوولادا كرایه‌وه و پلانی گونجاو بۆ دۆزینەوەی ڕێگەچارەیەک به‌مه‌به‌ستی ئاساییکردنەوەی دۆخی ناوچە كوردستانییه‌كانى ده‌ره‌وه‌ى ئیداره‌ى هه‌رێم خرایه ڕوو و لیژنه‌كه‌ی په‌رله‌مان لیژنە چەند پێشنیازێکی بۆ ئاساییکردنەوەی دۆخی ئه‌و ناوچانه خستەروو.
هه‌ر له كۆبوونه‌وه‌كه‌دا ڕاپۆرتی ڕاوێژکارانی سەرۆکی حکومەت و چۆنیەتیی ئامادەکردنی ڕاپۆرتی تایبەت بە کێشە و گرفتەکانی ناوچە کوردستانییەکانی دەرەوەی ئیدارەی هەرێم و چۆنیەتیی جێبەجێکردنی ئەو مادە یاساییانەی پەیوەندیدارن بەو ناوچانە تاووتوێ كران.
دوابه‌دوای كۆبوونه‌وه‌كه‌ش له كۆنگره‌یه‌كی ڕۆژنامه‌وانیی هاوبه‌شدا ناوه‌ڕۆكی كۆبوونه‌وه‌كه بۆ ده‌زگاكانی ڕاگه‌یاندن خرایه ڕوو.
