په‌یامێك له‌لیژنه‌ی شه‌هیدانه‌وه بۆ لیژنەی پەیوەندییەكانی دەرەوەی ئه‌نجوومه‌نی نوێنه‌رانی بەلژیكا
هەرێمی كوردستان بەئومێدێكی گەورەوە چاودێریی ئەو وڵاتانە دەكات كەهەنگاو دەنێن بۆ ناساندنی ئەو تاوانانەی لەلایەن ڕێكخراوی تیرۆریستیی داعش (دەوڵەتی ئیسلامی لە عێراق و شام)ەوە دژ بەئێزدییەكان ئەنجام دران وەك تاوانی جینۆساید.
بڕیاردان لەلایەن لیژنە بەڕێزەكەتانەوە (لیژنەی پەیوەندییەكانی دەرەوەی ئه‌نجوومه‌نی نوێنه‌رانی بەلژیكا) بۆ ناساندنی ئەو تاوانانەی دەرحەق بەئیزدییەكان كرا وەك تاوانەكانی جینۆساید، مایەی سوپاس و پێزانینمانە لەلیژنەی کاروباری شەهیدان و جینۆسایدو زیندانیانی سیاسی لەپەرلەمانی كوردستان-عێراق، وێڕای ئەوەی كەئەم بڕیارەتان دەربڕی هەڵوێستێكی بەرزی مرۆڤدۆستانەیە، لەهەمان كاتدا نیشانەی دۆستایەتیی گەلی بەلژیكایە بۆ قوربانییەكانی ئەو تاوانانەو گەلی كوردستان.
ئێزدییەكان بەو ئومێدەن كەكۆمەڵگای نێودەوڵەتیش بەگشتی هەنگاوی هاوشێوەی لیژنە بەڕێزەكەتان بنێت تاببێتە بنەمایەكی بەهێز بەئاراستەی دادگاییكردنی تاوانبارانی ئەنجامدەری ئەو تاوانانە لەدادگایەكی نێودەوڵەتی یان بەڕێگەی دامەزراندنی دادگایەكی تێكەڵی نێودەوڵەتی و نیشتمانی، بەمەبەستی ئەوەی كەلانی كەمی دادپەروەری لەو كەیسەدا بێتەدی و ڕێگریش بێت لەدووبارەبوونەوەی تاوانی لەو چەشنە لەداهاتوودا دەرحەق بەئێزدییەكان و گەلی كوردستان و گەلانی ناوچەكە، لەهەمان كاتدا ببێتە بنەمایەكیش بۆ قەرەبووكردنەوەی كەسوكاری قوربانییەكان و ئاوەدانكردنەوەی ناوچەكانیان.
لیژنه‌ی كاروبارى شەهیدان و جینۆسایدو زیندانیانی سیاسی لەپەرلەمانی كوردستان