د. هێمن هەورامی پیرۆزبایی لە یەکێتیی زانایانی ئاینیی ئیسلامیى كوردستان دەکات

بەڕێز.. سەرۆکی یەکێتیی زانایانی ئاینیی ئیسلامیی کوردستان..
بەڕێزان.. ئەندامانی مەکتەبی تەنفیزیی یەکێتیی زانایانی ئاینیی ئیسلامیی کوردستان..
بەبۆنەی یادی (٥٢) په‌نجاودوو ساڵه‌ی دامەزراندنی یەکێتیی زانایانی ئاینیی ئیسلامیی کوردستان، گەرمترین و جوانترین پیرۆزبایی خۆمان ئاراستەى ئێوه‌ی به‌ڕێز دەکەین، هیواى سەرکەوتن و سەرفرازی و به‌رده‌وامیتان بۆ ده‌خوازین لە خزمەتكردنی گەل و وڵات و ئاینى پیرۆزى ئیسلامدا.
یەکێتیی زانایان لە هەناوی شۆڕشی مه‌زنی ئه‌یلوولدا لە ناوچە ڕزگارکراوەکانی کوردستان و لەژێر ڕاسپارده‌ و ڕێنمایی سەرۆکی بزاڤی ڕزگاریخوازیی کوردستان، مەلا مستەفا بارزانی، لە ١٩٧٠/٩/٢١ دامەزرا به‌ ئامانجی خزمەتکردن و سەرپەرشتیکردنی زانایانی ئاینی و ڕێکخستنی کاروبارەکانیان له‌پێناو خزمەتگه‌یاندنی زیاتر به‌ ئاینى پیرۆزی ئیسلام و وڵات.
زانایانی ئاینیی ئیسلامیی کوردستان، هەمیشە لە پێشەنگی خەباتی نەتەوایەتیدا بوون، سەرەڕای فێرکردن و شیکردنەوەی بنەما ئاینییەکان، چەکیشیان لە شان بووە بۆ بەرگریکردن لە خاك و نیشتیمان و بە ڕێنماییەکانیان خەڵكیان بۆ ئاینپه‌روەری و وڵاتپەروەری هانداوە و کۆڵەگەی سەرەکیی پێكەوەژیان بوون، خوازیارین له‌ ئایندەشدا زانایان ڕۆڵی کارای خۆیان له‌ بەرزکردنەوەی ئینتیمای خه‌ڵك و وڵاتپەروەری و ناساندنیان بە بنەما سەرەکییەکانی ئاین و لێبووردەیی په‌ره‌پێبده‌ن و دەست لە ناو دەست لەگەڵ سەرجەم پێکهاتە ئاینییەکانی دیکە، گەنج و لاوانمان بۆ پێکەوەژیان و لێبووردەیی و خۆشویستن و خزمەتکردنی وڵات هان بدەن.
جارێکی دیکە ئەو یادەتان لێ پیرۆز دەکەینەوە و هەر سەرکەوتوو و سەرفراز بن.
د. هێمن هه‌ورامی
جێگرى سه‌رۆكی په‌رله‌مانى كوردستان
٢٠٢١/٩/٢٠