به‌بۆنه‌ی ساڵیادی دامه‌زراندنییه‌وه
د. هێمن هەورامی سه‌ردانی مه‌كته‌بی ته‌نفیزیی یەکێتیی زانایانی ئاینیی ئیسلامیی کوردستانى كرد
بەمەبەستی گەیاندنی پیرۆزبایی پەرلەمانی کوردستان، به‌بۆنه‌ی یادی (٥۲) ساڵەی دامەزراندنی یەکێتیی زانایانی ئاینیی ئیسلامیی کوردستان، پێشنیوەڕۆی ئەمڕۆ چوارشەممە ۲۰۲۲/۹/۲۱، د. هێمن هەورامی، جێگری سەرۆکی پەرلەمانی کوردستان، کە هەریەک لە مه‌لا ئیحسان ڕێکانی، جێگری سەرۆکی لێژنەی ئەوقاف و كاروبارى ئاینیی په‌رله‌مانی كوردستان، فەیسەڵ عه‌باس و وەیسی سەعید، ئەندامانی لێژنەکە، یاوەریان دەرکرد، سەردانی مەکتەبی تەنفیزیی یەکێتیی زانایانی ئاینیی ئیسلامیی کوردستانی لە هەولێر کرد و لەلایەن مامۆستا عه‌بدوڵا سه‌عید وەیسی، سەرۆکی یەکێتیی زانایان و ئەندامانی مەکتەبی تەنفیزی و ژمارەیەک لە مامۆستایانی ئاینی پێشوازیی لێکرا.
لەسەردانەکەیدا، د. هێمن هەورامی، بەناوی پەرلەمانی کوردستانەوە پیرۆزبایی (٥٢)هەمین ساڵیادی دامەزراندنی یەکێتیی زانایانی ئایندی ئیسلامیی کوردستانى له سه‌رۆك و ستافی مەکتەبی تەنفیزیی یەکێتییەکە كرد، هاوکات ڕۆڵ و پێگەی زانایانی ئاینی لە خزمەتکردنن ئاینی ئیسلام و ئاراستەکردنی دروستی کۆمەڵگە كرد و جەختی لەسه‌ر پێکەوەژیانی ئاشتییانەی نێوان سەرجەم ئاین و نەتەوە جیاوازەکانی کوردستان کردەوە کە یەکێتیی زانایانی ئاینی ئیسلامیی کوردستان ڕۆڵی سەرەکی دەگێڕن لە قووڵترکردنەوەی زیاتری ئەو پێکەوەژیانە.
هه‌روه‌ها ڕۆڵی زانایان و مامۆستایانی ئاینیی ئیسلامیى لە قۆناغەکانی بزووتنەوەی ڕزگاریخوازی کوردستان به‌رزنرخاند.
لەلایەن خۆیانەوە سەرۆک و ئەندامانی مەکتەبی تەنفیزیی یەکێتیی زانایانی ئاینیی ئیسلامیی کوردستان، وێڕای ده‌ربڕینی سوپاسگوزاریی خۆیان بۆ ئه‌و سه‌ردانه و به‌شداریكردنه‌ی جێگرى سه‌رۆكی په‌رله‌مان لە بۆنەی ساڵیادی دامەزرادنی یەکێتییەکەیان، به‌ڵێنیاندا كه هەموو توانایه‌كی خۆیان بخەنەگەڕ لە خزمەتکردنی زیاتر به ئاینی پیرۆزی ئیسلام و پاراستنی ئەو گیانی ته‌بایی و لێبوردەیی و پێکەوەژیانەی کە لە هەرێمی کوردستاندا هەیە، هه‌روه‌ها جەختیشیان لەسه‌ر هەماهەنگیی زیاتر له‌نێوان لێژنەی ئەوقاف و یەکێتیی زانایان کردەوە.
