د. ڕێواز فائق سه‌رپه‌رشتیی كۆبوونه‌وه‌یه‌كی فراوانی بۆ بەکوردیکردنی نووسراوە یاساییەکان لە دادگاکان كرد
بەمەبەستی تاووتوێکردنی هەنگاوەکانی جێبەجێکردنی پلانی ستراتیژیی نیشتیمانیی پێشنیارکراو لەلایەن دەستەی دەستپاکی بۆ (بەکوردیکردنی نووسراوە یاساییەکان لە دادگاکاندا)، ئه‌مڕۆ سێشه‌ممە ٢٠٢٢/٩/٦، د. ڕێواز فائق، سه‌رۆكی په‌رله‌مانی كوردستان، لەگەڵ نوێنه‌رانی ئەنجوومەنی دادوەری، دەستەی دەستپاکی، ئەکادیمیای کوردی و ژماره‌یه‌ك له بەشە پەیوەندیدارەکانی پەرلەمان کۆبووەوە.
لە کۆبوونەوەکەدا، کە نوێنەری لایەنە تایبەتمەندەکان ئامادەیبوون، هەنگاو و میکانیزمی ئامادەکردنی فەرهەنگی یاسایی فەرمی بۆ زاراوە یاساییەكان له بوارە جیاوازەکان تاووتوێ کرا و ئامادەبووان بەفەرمیکردنی فەرهەنگی یەکگرتووی زاراوە یاساییەکانیان بۆ کاری دامه‌زراوه ده‌ستوورییه‌كان لە هەرێمی کوردستان بە کارێکی گرنگ و پێویست وەسف کرد.
لای خۆیەوە د. ڕێواز فائق، سەرۆکی پەرلەمانی کوردستان، پشتیوانی و هاوکاریی ماددی و مەعنەویی پەرلەمانی بۆ ئامادەکردنی ئەو فەرهەنگە خستەڕوو، شاندی میوانیش سوپاسی سەرۆکی پەرلەمانیان کرد بۆ پاڵپشتی كردنیان، هه‌روه‌ها ڕۆڵی سه‌رۆكی په‌رله‌مانیشیان لە ئامادەکردنی ئەو فەرهەنگە بەرزنرخاند.
